Եթե «Մանչեսթեր Յունայթեդը» մտածում է «Աստոն Վիլլայի» ավագ Ռոն Վլարին գնելու մասին, ապա դա պետք է անի 12 մլն ֆունտով: Այս մասին հաղորդում է ESPN-ը՝ հղում անելով բիրմինգհեմյան ակումբի ներսում գտնվող իր աղբյուրին:
Վլարը Հոլանդիայի ազգային հավաքականի առաջատարներից էր, որը «Յունայթեդի» ներկայիս մարզիչ Լուի վան Գալի գլխավորությամբ այս ամռանը նվաճեց Բրազիլիայում կայացած աշխարհի առաջնության բրոնզե մեդալը:
Գաղտնիք չէ, որ «վիլլացիները» ցանկանում են պահպանել 29-ամյա հոլանդացուն, սակայն Վլարը դեռ չի համաձայնեցրել նոր պայմանագիրը, իսկ ներկայիս պայմանագիրը կլրանա արդեն այս մրցաշրջանի ավարտին:
Այս ամռանը «Յունայթեդն» ազատվեց Պատրիս Էվրայից, Նեմանյա Վիդիչից և Ռիո Ֆերդինանդից, ուստի նրանց անհրաժեշտ է փորձառու պաշտպան: Սակայն Վլարը բավական մեծ գումար կարժենա:
