«Մանչեսթեր Սիթին» վերջապես կարողացավ իրականացնել «Վոլֆսբուրգի» կիսապաշտպան Քևին Դե Բրյույնեի այդքան սպասված տրանսֆերը։
«Չելսիի» նախկին ֆուտբոլիստի համար «քաղաքայինները» 55 մլն ֆունտ են վճարել։ Վերջին շաբաթների ընթացքում «Սիթին» փորձում էր համաձայնեցնել Բունդեսլիգայի նախորդ մրցաշրջանի լավագույն ասիստենտի տրանսֆերային գումարը, և միայն այսօր նրանց հաջողվեց իրականացնել բելգիացու տեղափոխությունը «Էթիհադ»։
Քևինի հետ 6 տարվա պայմանագիր է ստորագրվել, որով նա կվաստակի շաբաթական 200 հզր ֆունտ։ Իր նոր թիմում Դե Բրյույնեն հանդես կգա 17 համարի մարզաշապիկով։
-Մենք շատ ուրախ ենք, որ Քևինը դարձավ մեր ֆուտբոլիստը, և ես չեմ կասկածում, որ նա մեծ հաջողությունների կհասնի այստեղ։ Մեզ դուր է գալիս հարձակվողական ֆուտբոլ խաղալ, և Քևինի նման ֆուտբոլիստը մեզ թույլ կտա պայքարել բոլոր չորս ճակատներում,- ակումբի պաշտոնական կայքին տված հարցազրույցում ասել է «Սիթիի» գլխավոր մարզիչ Մանուել Պելեգրինին։
