«Չելսիի» գլխավոր մարզիչ Ժոզե Մոուրինյոն կարծում է, որ «Աստոն Վիլլայի» դեմ խաղում Ռամիրեսի հեռացման մեջ մեղավոր էր մրցավար Քրիս Ֆոյը:
Խաղի վերջին րոպեին, որում «կապույտները» պարտվեցին նվազագույն հաշվով, Ռամիրեսը ցատկեց մրցակցի կիսապաշտպան Կարիմ Էլ-Ահմադիի ոտքին: Բրազիլիացին նույն պահին հեռացվեց դաշտից, ում հետևեց նաև Մոուրինյոն, ով համաձայն չէր մրցավարի որոշման հետ:
Չնայած, որ խաղից մի քանի օր է անցել, Ժոզեն այդպես էլ չի մոռանում այդ դեպքը: Պորտուգալացու կարծիքով, Ֆոյը կորցրել էր խաղի վերահսկողությունը և Ռամիրեսին հրահրեց գնալ նման քայլի:
-Ես զայրացած էի այն բանից, ինչ եղավ, սակայն դուք գիտեք, որ ֆուտբոլում դժվար է կառավարել էմոցիաները: Դաշտում կան մարդիկ, ովքեր պատասխանատու են, որ ֆուտբոլիստները վերահսկեն իրենց էմոցիաները, սակայն երբեմն նույն այդ մարդիկ դրդում են, որ ֆուտբոլիստները կորցնեն վերահսկողությունը:
Արդո՞ք դա կարմիր քարտի խախտում էր: Այո՛, դա կարմիր քարտ էր: Սակայն մրցավարը կորցրել էր խաղի վերահսկողությունը, ինչն էլ բերեց այդ խախտմանը,- Մոուրինյոյի խոսքերն է մեջբերում Daily Mirror-ը:
Ավելացնենք, որ Մոուրինյոն որակազրկվել է մեկ խաղով և բաց կթողնի «Արսենալի» դեմ առաջիկա խաղը:
