Պրեմիեր Լիգան «Տոտտենհեմին» հայտնել է, որ ակումբը մեկ մրցաշրջանի ընթացքում չի կարող տնային խաղերն անցկացնել երկու տարբեր մարզադաշտերում:
Այս պահին «Տոտտենհեմն» ակտիվորեն մարզադաշտ է փնտրում, որտեղ կկարողանա 2017/18 մրցաշրջանում անցկացնել իր տնային խաղերը, մինչև պատրաստ կլինի 61 հզր տեղանոց նոր մարզադաշտը, որը կփոխարինի «Ուայթ Հարթ Լեյնին»:
Դիտարկվող տարբերակներից է «Ուեմբլին» և «Սթեդիում ՄԿ»-ն: Սակայն Անգլիայի գլխավոր մարզադաշտի համար պայքարում է նաև «Չելսին», որը հնարավոր է ստիպված լինի երեք մրցաշրջան խաղալ այլ մարզադաշտում:
«Տոտտենհեմում» մտածում էին տնային խաղերը միանգամից երկու մարզադաշտերում անցկացնելու մասին: Սակայն Պրեմիեր Լիգայի գործադիր տնօրեն Ռիչարդ Սկադամորը բացառել է այդ տարբերակը:
-Նրանք պարտավոր են ողջ մրցաշրջանի ընթացքում խաղալ մեկ մարզադաշտում: Հնարավոր չէ տնային խաղերի մի մասն անցկացնել «Միլթոն Կինսում», իսկ մյուսն՝ «Ուեմբլիում»: Դա բացառված է: Դա մեր առաջնությունում չի թույլատրվում,- ասել է Սկադամորը: The Guardian
Ավելացնենք, որ Սկադամորը չի բացառում «Ուեմբլիի» կամ այլ մարզադաշտի վարձակալումը միանգամից «Չելսիի» և «Տոտտենհեմի» կողմից: Ռիչարդը նաև կարծում է, որ «Տոտտենհեմի» համար ամենից հարմար տարբերակն իր հարևան «Արսենալի» տնային մարզադաշտ «Էմիրեյթսի» վարձակալումը կլինի:
