«Մանչեսթեր Յունայթեդի» հարձակվող Ռոբին վան Պերսին ծնկի վնասվածք ստանալուց հետո մեկնել է հայրենի Հոլանդիա, որպեսզի արագացնի ապաքինումը:
Հիշեցնենք, որ «Օլիմպիակոսի» դեմ Չեմպիոնների Լիգայի 1/8 եզրափակիչ պատասխան խաղում Ռոբինը վնասեց ծունկը: Խաղից մի քանի օր հետո հայտարարություն եղավ, որ վան Պերսին բաց կթողնի չորսից վեց շաբաթ:
Ինչպես հաղորդում է Daily Mirror-ը, շաբաթ օրը 30-ամյա հարձակվողին նկատել են Ռոտերդամում: Վան Պերսին այցելել է տեղի բժշկական կենտրոն, որտեղ նրան ստուգվել է համաշխարհային բարձր մակարդակի վիրաբույժ Ռեյն Հեյբուրը:
Նշանավոր մասնագետը կարծում է, որ «Յունայթեդի» բժիշկների կանխատեսումները չափից շատ լավատեսական են: Շատ հավանական է, որ Ռոբինը բաց կթողնի ութ շաբաթ և Պրեմիեր Լիգայի այս մրցաշրջանում այլևս դաշտ դուրս չի գա:
Այս պարագայում, վան Պերսիի գլխավոր նպատակն է աշխարհի առաջնության մեկնարկից առաջ վերադառնալ լավ մարզավիճակին:
